Beynəlxalq Əfv Təşkilatı Bəhreyn hökumətinin islahat haqda verdiyi sözləri üzərində durmamasını pisləyib. Təşkilat ölkədə təzyiqlərin davam etdiyini qeyd edib. Beynəlxalq Əfv Təşkilatının Yaxın Şərq və Şimali Afrika üzrə sədri Səid Bumudohe Bəhreyndə xalq qiyamından 4 il keçməsinə baxmayaraq  repressiya və zorakılığın artdığını və təhlükəsizlik qüvvələri tərəfindən insan haqları pozuntularının geniş vüsət aldığını bildirib. Xəbərdə Bəhreyndə məhbusların sayının artmasıyla yanaşı, 18 yaşdan aşağı kəslərin belə məhbuslar arasında olduğu və məhbusların müxtəlif işgəncələrə məruz qaldığı bildirilir. Qeyd edək ki, dünən Bəhreyndə xalq tərəfindən yenidən geniş etiraz aksiyaları və yürüşlər keçirilib və  başda "Əl-Vifak" hərəkatının rəhbəri Şeyx Əli Salman olmaqla bütün məhbusların azadlığa buraxılması və insan haqlarına riayət olunması tələb olunub.