Müxbirimiz hadisə yerində olub və aksiya iştirakçılarından müsahibələr alıb.

 Tanınmış ruhanı Hacı Sərdar Hacıhəsənli:

 -Biz 12 saylı cəza çəkmə müəssisəsinin qarşısındayıq. Burda olmağımızın səbəbi aydındır. Biz oktyabrın 9-da burada, qapalı məhkəmə keçirilərək Mövsüm Səmədovun  iki il müddətində daha ağır rejimli Qobustan həbsxanasına keçirilməsinə etiraz etmişdik. Bizim tələblərimizə cavab olaraq onlar Hacını elə məhkəmə zalından “karserə” qaytardılar. Ölkə ruhaniləri, ziyalılar hacıya həmrəylik bildirmək üçün buraya gəliblər. Onlar bu etiraz aksiyası ilə göstərmək istəyirlər ki, ölkə ictimaiyyətinin, vətəndaşların müraciətinə əsla məhəl qoyulmur.  Bu təzyiqlərin davam etdirilməsi, sözün əsil mənasında, dindar kəsimin kəskin narazılığına səbəb olub.

 Ən şüurlu iqtidar xalqa güvənəndir. Hansı iqtidar ki, gücünü mütəfəkkir insanların, millətin rifahına, inkisafına yönəldir, bu hakimiyyətlər daim yaşayır, xalqının dəstəyini qazanır. Bu gün isə xalqın ən layiqli övladları  37-ci illərdə olduğu kimi, repressiyalara məruz qalıb. Əgər bu gün Vətəninin inkisafı, suverenliyi  uğrunda əmək sərf edən, vətəndaşların hüququnu qoruyan insanlar repressiyalara məruz qalırsa, ölkənin düşünən başları, ziyalıları, alimləri bu tikanlı məftillər arxasındadırsa, görəsən sabah bu xalqı, torpaqları kimlər müdafiə edəcək? 

 Mən Azərbaycan hakimiyyətinə üzümü tutub deyirəm ki, xalıqın var-dövləti sayılan neftin pulu ilə kimlərisə doydurmaqla, kimlərinsə boğazından kəsərək yadlara töhvə verməklə, Azərbaycanın xoş gələcəyinə nail olacaqlarını düşünməsinlər. Azərbaycanın sabahı bu xalqdadır. Xalqın səbri ilə oynamasınlar, kristal təmizliyə malik bu insanlara sayğı ilə yanaşsınlar, onlara bu cür təzyiqlər etməklə pislik etməsinlər. Biz bir daha Azərbaycan dindarları adından tələb edirik ki,  Azərbaycan İsalm partiyasının rəhbərinin, həmçinin başqa dindarlar- Hacı Fəraməz, Hacı Abgül, Hacı Taleh və saxta ittihamlarla həbs edilmiş digər insanlar azad edilsin. Biz onları azadlıqda, xalqın önündə, xalqın içində görmək istəyirik.

 -AİP sədr əvəsi hacı Elçin Manafov:

 -Biz bu gün Qədir-Xumla bağlı tədbirin davamı olaraq, bura yığışdıq. Dünən mətbuatda gedən xəbərlərdən məlum oldu ki, Hacı Mövsüm Səmədovu yenidən “karsa”salıblar. Ona qarşı təzyiqlər davam edir. Böyük narahatlıq hissi ilə bura gəldik. Görüş üçün müraciət edilsə də bu imkan yaradılmadı. Lakin həbsxana rəhbərliyi bizimlə görüşərək Mövsüm Səmədovun səhhətinin yaxşı olduğunu, saxlanma şəraitindən narazılıq etmədiyini bildirdi.

 AİP funksioneri hacı Akif Heydərli:

 -Bu günki aksiyamızın əsas səbəbi  AİP sədrinə qarşı həbsxanada artan təzyiqlərdir. Bu aksiyada partiyanın funksionerləri, ruhani alimlər, ictimaiyyət nümayəndələri iştirak edirlər. Biz buna görə bütün dəstək olan insanlara öz minnətdarlığımızı bildiririk. Əlbəttə, Mövsüm Səmədova qarşı bu cür ədalətsizliklər onu əqidəsindən döndərə bilməz. Mövsüm kimi insanların dəyərləndirilməsi dini cameənin, xalqımızın ümdə vəzifəsidir. Bu kimi insanlar öz əqidələri uğrunda ölümə belə hazırdırlar.