Milli Şuranın aksiyasında həbs edilən gənclərə 8 sutkalıq cəza verildi
Posted on : qafqaz 10/16/2017 1:00:15 PM
Bu gün - sentyabrın 19-u Yasamal Rayon Məhkəməsi Milli Şuranın aksiyasından sonra tutulan gənclərdən 4-nə 8 sutka inzibati həbs verib.
AzadlıqRadiosunun müxbiri xəbər verir ki, onlar Toğrul İbrahim,
Məcnun Pirəliyev, Ülfət Həsənqarayev və Orxan Carçıdır.
Gənclər polisə müqavimət göstərməkdə təqsirli bilinir.
Milli Şuranın sentyabrın 17-də keçirilən referendum əleyhinə
aksiyasında ümumilikdə 14 gəncin saxlandığı bildirilir. Yaxın dəqiqələrdə digər
saxlananlarla da bağlı hökm veriləcəyi gözlənir.
Şahidlərin sözlərinə görə, Milli Şuranın sentyabrın 17-də keçirilən
mitinqdən sonra polis aksiyaçılara hücum edərək, onları əvvəlcədən gətirdikləri
avtobuslara doldurub. 40-dan artıq aksiyaçı tutulub. Polis müdaxiləsindən öncə
gənclərdən metronun «İnşaatçılar» stansiyasına doğru irəliləyərkən müxtəlif
şüarlar səsləndirənlər də olub. Saxlananlardan çoxu sonradan sərbəst buraxılıb.
Bakı Şəhər Baş Polis İdarəsinin yaydığı məlumatda qeyd edilirdi ki,
aksiya iştirakçılarından bəziləri ictimai asayişi pozduqlarına görə
saxlanıblar.
Milli Şura Konstitusiyaya dəyişiklik əleyhinə aksiya keçirib.