Türkiyə Ordusunun  artilleriya qüvvələri Manbic şəhərində Suriya Demokratik Qüvvələri (SDQ) qruplaşmasının mövqelərini atəşə tutublar. FaktXəbər-in Tass-a istinadən məlumatına görə, bu barədə SDQ-nin hərbi nümayəndəsi  Şarfan Dərviş Firat News Agency-ə bildirib.

"Türkiyə qoşunları Manbicdən şimalda Sacur  çayı ərazisində bizim müdafiə xətlərimizi atəşə tutub", - deyə komandir bildirib. Onun sözlərinə görə, cəbhənin bu ərazisində onlarla raket partlayıb. Dərviş vurğulayıb ki, İŞİD terrorçuların ən yaxın  mövqeləri 20 km kənardadır.

"Türk artilleriyası  muzdurlara  bir zərbə olsun belə vurmayıblar. Onlar ancaq bizim mövqeləri atəşə tutublar", - deyə SDQ nümayəndəsi bildirib.

Bundan əvvəl türk hərbçilərinin eyni anda iki istiqamətdə – kürd mövqelərinin yerləşdiyi Manbic şəhəri istiqamətinə və İŞİD terrorçularının olduğu Carablus  şəhəri yaxınlığını atəşə tutduqları barədə məlumat yayılmışdı.

Qeyd edək ki, kürd qruplaşması İŞİD terror qruplaşmasını Carablusa doğru sıxışdırıb. Türkiyə isə Yevfrat çayının qərb sahilində olan bu şəhərin kürdlərin nəzarətinə keçməsini istəmir.