Britaniya paytaxtının meri Sadiq Xan ABŞ prezidenti Donald Trampın ritorikasını "XX əsrin faşistlərinin dili" kimi xarakterizə edib.

Tashaio.com-in məlumatına görə, o, belə bir açıqlamanı ABŞ prezidentinin Böyük Britaniyaya səfəri ərəfəsində verib.

"Tramp böyüyən qlobal təhlükənin ən aydın nümunələrindən biridir. Bizim əziyyətlə qazandığımız haqları, azadlıqları və dəyərləri təhdid edən bu ritorika artıq bütün dünyada populyarlıq qazanır", - "Guardian"a London meri deyib.

Onun fikrincə, Macarıstan baş naziri Viktor Orban, İtaliya baş nazirinin müavini və İtaliya daxili işlər naziri Matteo Salvini, Fransa Milli Birlik Partiyasının lideri Marin Le Pen və Birləşmiş Krallıq İstiqlal Partiyasının keçmiş lideri Nigel Fərəc də eyni ABŞ prezidenti kimi seçicilərin dəstəyini almaq üçün eyni ifadələrdən istifadə edir.

Eyni zamanda, Xanın sözlərinə görə, Avropa siyasətçiləri öz mövqeyinin mahiyyətini çatdırmaq üçün yeni, "vəhşi" üsullardan istifadə edirlər.

Qeyd edək ki, Donald Tramp 3-5 iyun tarixlərində Böyük Britaniyaya səfər edəcək.