İslam aləmində əzalı Fatimiyyə günləri başlayır
Posted on : Əqidələr 01/31/2018
Bu günlər Fatimətuz-Zəhranın (s.ə) əzadarlıq günləridir.
Xanım Fatimə (s.ə) bütün müsəlman ümmətinin baş tacı, göz nurudur. Hər kəs o Xanımı (s.ə) böyük ehtiramla yad edir. Həmçinin Xanım (s.ə) Allah Rəsulundan (s) sonra sağ qalmış yeganə övladıdır. Bütün 12 imam (ə) və imamzadələr o Xanımın (s.ə) soyundandır.
Xanımın (s.ə) məzar yeri məlum deyil. O dövürdə məlum çəkişmələr və siyasi böhranlar səbəbi ilə İmam Əli (ə), övladları (ə) və yaxın dostları Xanımı (s.ə) gecə gizli şəkildə dəfn edirlər. Bu səbəbdən Xanım Zəhranın (s.ə) məzar yeri və vəfat tarixi dəqiq məlum deyil.
Xanımın (s.ə) vəfat günü ilə bağlı əsas iki tarixi gün qeyd edilir. Bir mənbədə Xanımın (s.ə) şəhadəti Allah Rəsulunun (s) vəfatından 75 gün sonra, digər bir mənbədə isə 95 gün qeyd olunur. Belə olduqda Xanımın (s.ə) şəhadəti ya cəmadul-əvvəlin 13-nə və ya cəmadius-saninin 3-nə təsadüf edir.
Bu səbəbdən müsəlmanlar bu iki gün arasında olan 20 günü “Əyyami Fatimə” günləri kimi qeyd edir.
Bu 20 gün müsəlmanlar üçün əzalı Fatimiyyə günləri hesab olunur və bu günlərdə Xanım Fatiməyə (s.ə) əzadarlıq məclisləri təşkil olunur.
Yaşar Nuriyev/İslaminSesi