Hikmət Hacıyev Almaniyanın “Berliner Zeitung” qəzetinə müsahibəsində Naxçıvan Muxtar Respublikasını Azərbaycanın əsas hissəsilə birləşdirmək üçün Kalininqrad modelindən istifadə olunmasını məqsədəuyğun hesab edib.

O deyib: “Azərbaycan Respublikası Ermənistanın Sünik vilayətinə nəzarət iddiasında deyil və yalnız Naxçıvana gedən yüklərin nəzarətsiz keçməsini istəyir. Beynəlxalq prosedurda belə bir nümunə var və Kalininqrad vilayətinin Rusiya ilə quru əlaqəsi gömrük yoxlamaları olmadan təmin edilib”.

O, bildirib ki, Azərbaycan malların Naxçıvana maneəsiz çatmasının Ermənistan tərəfindən həyata keçməsini gözləyir.

Azərbaycan prezidentinin köməkçisi Kalininqrad modeli haqqında da deyib: “Azərbaycanı asan keçid gözləyir və biz Kalininqrad kimi modelləri nəzərdən keçirməyə hazırıq”.

Qeyd edək ki, Kalininqrad modeli 2021-ci ilin əvvəlində siyasət və beynəlxalq hüquq üzrə israilli ekspert Maykl Finkel tərəfindən təklif edilib.

Sovet İttifaqının dağılmasından sonra digər respublikalar kimi Litva da müstəqil oldu, Rusiyanın bir hissəsi olan Kalininqradın ölkənin əsas hissəsi ilə əlaqəsi kəsildi. Litva ilə Rusiya arasında sərhəd müqaviləsi 1997-ci ildə imzalansa da, Dövlət Duması onu ratifikasiya etməyib. Rusiya müqaviləni yalnız Kalininqrad vilayətinə tranzit daşımalarla bağlı razılığa gəlindikdən sonra ratifikasiya edib.

Bununla da Litva öz ərazisindən vizasız tranzitə razılaşıb, Aİ-Rusiya birgə bəyanatında da bildirilir ki, tranzit rejimi Litvanın lazımi nəzarəti tətbiq etmək və ərazisinə giriş qadağaları tətbiq etmək barədə suveren hüququnu məhdudlaşdırmayacaq.

Bütün bunlara baxmayaraq, Litva son zamanlar Rusiyanın Kalininqrad vilayətinə yüklərin tranzitinə məhdudiyyətləri genişləndirib. 2022-ci ildə Litva hakimiyyəti embarqoya məruz qalan yüklərin dəmir yolu ilə Kalininqrad vilayətinə kvota vasitəsilə daşınmasını məhdudlaşdırıb. Məhdudiyyətlərə tikinti materialları, ağac, metallar, sement, kürü və spirt daxildir.