İKİNCİ SƏCİYYƏ: MÜLAYİM RƏFTAR
Posted on : Digər sahələr 10/16/2017 1:00:26 PM
MÜLAYİM RƏFTARA TOXUNAN AYƏLƏR-2
Rəhman Allahın
həqiqi bəndələrinin xüsusi səciyyələrindən olan camaatla hövsələ və təmkinlə
davranmaq, məxsusən nadanlarla mülayim rəftar etmək, bihudə sözlərə əhəmiyyət
verməmək, əfv və güzəşt sahibi olmaq haqda Qurani-Kərimin üç ayəsində söz açılır:
1. “Furqan” surəsi, 63-cü ayə:
...وَإِذَا خَاطَبَهُمُ الْجَاهِلُونَ قَالُوا سَلَامًا
“...(Rəhman
Allahın həqiqi bəndələri) nadanlar (xoşagəlməz sözlərlə) onlara xitab edən
zaman “salam” (xoş və yumşaq söz) deyən kəslərdir.”
2. “Əraf” surəsi, 199-cu ayə:
خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ
“Əfv
və güzəşt yolunu tut, yaxşı işlər görməyi əmr et və nadanlardan üz döndər
(onlarla döyüşə başlama).”
Burada neçə mətləb
diqqəti özünə cəlb edir:
a) Bu ayədə birbaşa
Peyğəmbəri-Əkrəmin (s) özünə tapşırıq verilir. Yəni əfv, güzəşt və başqalarının
xətalarını bağışlamaq məsələsinə ilk növbədə rəhbərlər riayət etməlidirlər ki,
cəmiyyət də onları örnək bilsin.
b) İmkan olduğu
surətdə insan malının artıq qalanını Allah yolunda möhtaclara infaq etməli, hər
zaman orta həddi gözləməli (ifrat və təfritdən uzaq olmalı), başqalarının
üzrünü qəbul etməyi bacarmalı və hər işdə çətinlik yaratmamalıdır!
c) Nadanların
nalayiq sözləri, töhmət və ya yersiz mübahisələrinə tez reaksiya verməməli,
onların kənarından alicənablıqla ötmək lazımdır. Ərəb şairi demişkən:
وَلَقَدْ مَرَرْتُ عَلى اللَّئِيمِ
يَسُبُّنِى
فَمَضَيْتُ ثَمَّةَ قُلْتُ لَاَيَعْنِيِنِى
“Nadan bir şəxslə
rastlaşarkən mənə nalayiq sözlər dedikdə, kənarından alicənablıqla keçərək,
öz-özümə dedim ki, məqsədi mən deyildim.”
ç) İmam Sadiqdən
(ə) “Qurani-Kərimdə əxlaqa dair ən əhatəli ayə hansıdır?” – deyə soruşduqda,
“Əraf” surəsinin 199-cu ayəsini göstərir. Çünki bu ayədəki iffət, hikmət və
şücaət məsələləri əxlaqın üçlük üsulunu təşkil edir.
2. “Furqan” surəsi, 72-ci ayə:
وَإِذَا مَرُّوا بِاللَّغْوِ مَرُّوا كِرَامًا
“(Onlar)
bihudə və boş şeylərin yanından etinasız və alicənablıqla keçirlər.”
Rəhman Allahın
bəndələri hər hansı bihudə söz-söhbət və işlərdən tamamilə uzaqdırlar və belə
hallarla üzləşdikdə də, kənarından alicənablıqla keçirlər.
Bir sözlə, rəhman
Allahın həqiqi bəndələrinin səciyyələrindən biri də nadan insanlarla hövsələ və
təmkinlə davranmalarıdır. Onlar nadanların hər sözünə əsəbiləşmir və mümkün qədər
qarşı tərəflə mülayim rəftar edirlər.
Rza Şükürlü
(Maide.az)