İslam həmrəyliyi “oyunları”
Posted on : Digər sahələr 10/16/2017 1:00:26 PM
Görəsən, abidə və məscidlərin sökülməsi də bu proqramdakı yarışların bir növüdürmü?
Bir sıra tədbirlərə
ev sahibliyi etmiş ölkəmiz, may ayının 12-22-si aralığında keçirilməsi
planlaşdırılmış IV İslam Həmrəyliyi Oyunlarına da ev sahibliyi edəcək və buna
ciddi şəkildə hazırlaşır. Amma bu tədbirin digərlərindən fərqi ondadır ki, əcnəbi
idmançılar və turistlərin əksəriyyəti 50 müsəlman ölkəsindən gələn inanclı
insanlar olacaq. Onların özünəməxsus həyat tərzini nəzərə alsaq, bu idman
oyunlarının nəinki İslam həmrəyliyinə, heç İslam dininin özünə uyğun olmadığını
görərik. Bu məsələni incələdikdə xeyli fəsad və pərdəarxası planların olduğunu
görmək mümkündür.
Pərdəarxası
oyunlara alət edilərək İslam Həmrəyliyi adı altında keçirilən oyunlar əslində
"Qlobal Oyunlar"dan başqa bir şey deyil. Əksinə, dünya siyasətini və
insanları istiqamətləndirmək üçün hazırlanmış planın tərkib hissəsidir.
İslam Həmrəyliyi
Oyunlarının idarə və nəzarət edilməsinə görə cavabdeh olan təşkilat - İslam Həmrəyliyi
İdman Federasiyası (İHİF), İslam Əməkdaşlıq Təşkilatının (İƏT) bir bölməsidir.
İƏT 4 qitədən 57 dövlətin üzv olduğu, BMT-dən sonra ən böyük dövlətlərarası təşkilatdır.
“İƏT dünyanın müxtəlif xalqları arasında sülh və əmin-amanlığın təbliğatı
ruhunda İslamın maraqlarını qoruyan dünya müsəlmanlarının ortaq səsidir”
fikrini formalaşdırmağa çalışır. Amma İslam Həmrəyliyi adı altında İslamın
maraqlarına yad işlərlə məşğuldur. İslamda həmrəylik insanların görüntü olaraq
deyil, əksinə, dinin vacibatlarına əməl edərək bir araya gəlməsidir.
Təşkilatçı
qurumların verdiyi məlumatlara əsasən, müsəlman ölkələrindən gələn qonaqlar
üçün halal qidalardan tutmuş, gün ərzində dindarların ibadətinin təşkilinə,
onların məscidlərdə namaz qılmasının təmin edilməsinə kimi hər şeyin qaydasında
olmasına çalışırlar.
Artıq ötən ildən
hökumətin İslamiadaya hazırlıqla bağlı hotellərdə “Halal standartı” layihəsinə
başladığı bildirilir. Mədəniyyət və Turizm Nazirliyi Azərbaycan Turizm
Assosiasiyası (ATA) ilə birgə hotellərdə və turizm mərkəzlərində tətbiq
olunacaq halal standartları hazırlayacaqlar. ATA sədrinin müşaviri mətbuata
açıqlamasında deyib ki, İslam ölkələrindən gələn turistlərin məmnunluğunu
artırmaq məqsədilə önəmli işlər görülür. İslam Həmrəyliyi Oyunları ilə əlaqədar
turistlər üçün hotellərdə namaz otaqlarının təşkili və ATA-nın nəzdində
yaradılan Bakı ekskursiya bürosunda ərəb və fars dillərini öyrənmək üçün
ekskursiya bələdçiləri də hazırlanır.
Əslində halal
qida və ibadət üçün şəraitin yaradılmasını gündəmə gətirmək gözdən pərdə asmaq
üçün bir bəhanədir. Əgər həqiqətən də İslam dini və müsəlmanlar önəmli olsa
idi, idman yarışlarının tərkibində olan dinə zidd oyunlar proqramdan
çıxarılardı. "İslam Həmrəyliyi Oyunları" çərçivəsində qadınlar
arasında keçiriləcək voleybol, üzgüçülük və başqa digər idman növlərindəki
oyunlarda qadınların dinə zidd geyimlərinin İslam dininə və əxlaqına bir
aidiyyatı yoxdur. İslam dinində qadın bədəninin onun yaxını, məhrəmi olan kəsdən
başqasına görünməsi haram olduğu halda, "İslam Həmrəyliyi" adı
altında nümayişi İslam dininə xəyanətdir. İslam həmrəyliyi adı altında dünyada
təşkil olunan bu idman oyunları və digər tədbirlər, əslində, İslam dininin
Allahın qoyduğu deyil, insanların təyin etdiyi qaydalar çərçivəsində təbliğatıdır.
Bu işlər insanları İslamın əsaslarından uzaqlaşdıraraq özlərinin təyin etdiyi
İslam qaydalarına yönəltmək məqsədi daşıyır.
Bundan başqa IV
İslam Həmrəylik Oyunlarına ev sahibliyi edərkən 50-dən çox müsəlman ölkəsinin
qatılacağı idman yarışları günlərində iştirakçı və qonaqlara çeşidli proqram və
tədbirlərdə Azərbaycanın zəngin mədəniyyətini və incəsənətini təqdim etməyi
planlaşdıran qurumlar, görəsən, niyə tarixi abidə kimi qeydiyyata salınmış məscidləri
sökməyə başlayıblar? Görəsən, abidə və məscidlərin sökülməsi də "İslam Həmrəyliyi
Oyunları" proqramındakı yarışların bir növüdürmü?
Rəşad Dadaşov
AİP Gənclər Təşkilatı