Taleh Bağırovun da Avropa Məhkəməsinə şikayəti yoxa çıxıb
Posted on : qafqaz 10/16/2017 1:00:19 PM
Taleh Bağırovun da Avropa Məhkəməsinə şikayəti yoxa çıxıb
Avropa İnsan
Haqları Məhkəməsinə göndərdiyi şikayəti yoxa çıxan tanınmışların sırasına biri
də qoşulub – Müsəlman Birliyi Hərəkatının sədri, həbsdə olan ilahiyyatçı Taleh
Bağırov. Bu barədə ilahiyyatçının vəkili Cavad Cavadov məlumat verib.
Qəsdən, yoxsa səhlənkarlıqdan?
Vəkil deyir ki,
Taleh Bağırovun həbsi haqda qərardan Avropa Məhkəməsinə bundan əvvəl göndərdiyi
şikayətə əlavədən ibarət ərizəni noyabrın 12-də “Azərpoçt” MMC-nin Bakı şəhər 7
saylı şöbəsində yola salıb. Amma indiyə qədər məktubun kodu (RR002827845AZ) izləmə
sistemində yoxdur.
Vəkil məsələ ilə
əlaqədar “Azərpoçt”a şikayət məktubları yazıb. Cavad Cavadova noyabrın 24-də
şifahi cavab verilib ki, “məktub hansısa səbəbdən izləmə sisteminə oturmayıb və
hazırda məsələ araşdırılır”.
“Son vaxtlar bu
cür halların çoxalması bunun qəsdən, yoxsa səhlənkarlıqdan baş verməsi barədə
ciddi düşünməyə əsas verir”, – Cavad Cavadov bildirib.
Başqa bir vəkil
Elçin Sadıqov da Heydər Əliyevin heykəlinə siyasi şüar yazandan sonra həbs
olunmuş gənc fəal Bayram Məmmədovun həbsilə bağlı Avropa Məhkəməsinə göndərilən
məktubun məhz həmin – 7 saylı poçt şöbəsində yoxa çıxdığını bildirib.
“Elektron izləmə
zamanı müəyyən etdik ki, eyni gündə göndərilən başqa bir məktub Avropa İnsan Hüquqları
Məhkəməsinə çatdırılsa da, Bayram Məmmədovun şikayəti qəsdən göndərilməyib və
sistemdə görünmür”, – deyən Elçin Sadıqov bu cür halların mütəmadi xarakter
aldığını vurğulayıb. Vəkil hesab edir ki, məsələni beynəlxalq təşkilatlar
qarşısında qaldırmaq lazımdır.
Bu yaxınlarda
AXCP sədrinin müavini Fuad Qəhrəmanlı haqda həbs qərarından, AXCP üzvü Murad
Ədilov barədə hökmdən Avropa Məhkəməsinə göndərilən şikayətlər də müəmmalı şəkildə
yoxa çıxıb.
“Azərpoçt”dan məktubların
qəsdən “itirilməsi” barədə deyilənləri doğru saymırlar: “Texniki səbəblərdən
hansısa məktubun itməsi, mənzil başına gec çatması baş verə bilər. Bunlar bütün
dünyada poçt işinin tərkib hissəsidir. Konkret məktuba gəldikdə isə, kiminsə
şikayəti varsa, poçta rəsmi sorğu verib araşdırma aparılmasını istəyə bilər”./azadlıq/