“The Korea Herald”-a müsahibəsində “Hazırda koreyalılar məni müsəlman olduğuma görə, kənarlaşdırmırlar”- deyən Koreya İnstitutlarından birinin tələbəsi olan Muhəmməd 2010-cu ildə, Koreyaya ilk gəldiyində, koreyalıların müsəlmanlara, ilk növbədə, məscidə gedənlərə aqressiv münasibət göstərdiyini bildirib: “O dövr bizim üçün çox gərgin keçdi”.

İordaniyada doğulan 28 yaşlı gənc, Seuldakı universitetdə mühazirələr arası namaz qılmaq üçün məscidə gedəndə ətrafdakılar ona soyuq yanaşıb.

Lakin son illər vətəndaşları İslam haqqında maarifləndirmək üçün Koreya müsəlmanları tərəfindən aparılan tədbirlər və pulsuz ərəb dili kursları cəmiyyətdə müsəlmanlara münasibətin yaxşılaşmasına gətirib çıxarıb.

Paytaxtdakı mərkəzi məscidin imamı Cu-Xva “Hər il burada dinlərarası dialoqlar aparılır. Biz birgə yaşayıb əməkdaşlıq etməyin yollarını müzakirə edirik” deyə, bu yumşalmanın səbəblərini izah edib.

Yerli ərəb mədəniyyəti mərkəzinin direktoru Kim San-Künun sözlərinə görə, 3 il öncə mərkəzdə ərəb dilini cəmi 2 nəfər öyrənirdi, hazırda isə bu kurslara 100 nəfərdən çox tələbə yazılıb.