Prezident Rəcəb Tayyib Ərdoğan və Rusiya Prezidenti Vladimir Putin sentyabrın 4-də Soçidə görüşüb.

İki liderin görüşündə əsas gündəm məsələsi Türkiyə və Birləşmiş Millətlər Təşkilatının vasitəçiliyi ilə imzalanan, lakin iyul ayında Rusiyanın geri çəkildiyi Taxıl Dəhlizi sazişi olub.

Ukrayna və Rusiya inkişaf etməkdə olan ölkələrin etibar etdiyi buğda, arpa, günəbaxan yağı və digər malların əsas təchizatçılarıdır.

Türkiyə və BMT-nin vasitəçiliyə ilə 2022-ci ilin fevralında Ukrayna taxılının Qara dəniz limanlarından ixracına şərait yaradan saziş imzalanıb.

Lakin Rusiya iyul ayında Rusiyanın ərzaq və gübrə ixracına maneələrin aradan qaldırılmasını vəd edən razılaşmanın yerinə yetirilməməsindən şikayət edərək müqaviləni uzatmaqdan imtina edib və keçən ildən bəri rekord miqdarda buğda göndərməsinə baxmayaraq, daşınma və sığorta ilə bağlı məhdudiyyətlərin kənd təsərrüfatı ticarətinə mane olduğunu söyləyib.

Rusiya prezidenti sanksiyaların qaldırılacağı təqdirdə taxıl müqaviləsini canlandıra biləcəklərini bildirib.

Putin bildirib ki, əgər bu öhdəliklər yerinə yetirilərsə, Rusiya "yaxın günlərdə" razılaşmaya qayıda bilər. Rusiya lideri əlavə edib ki, Rusiya emal və yoxsul ölkələrə çatdırılmaq üçün Türkiyəyə 1,1 milyon ton ucuz taxıl göndərəcək.

O, həmçinin bildirib ki, Rusiya 6 Afrika ölkəsinə pulsuz taxıl tədarükü ilə bağlı sazişi yekunlaşdırmağa yaxındır.

Putin, Qara Dəniz Təşəbbüsünün humanitar məqsədlər daşımadığını, göndərilən ərzaqların 70 faizinin inkişaf etmiş ölkələrə çatdığını, yalnız 3 faizinin isə yoxsul ölkələrə göndərildiyini bildirib.

Putin Ukraynanın dünya ərzaq ixracatında payının 5 faiz olduğunu və getdikcə azalacağını iddia edib.

Ərdoğan da Rusiyanın gözləntilərinin hər kəsə bəlli olduğunu bildirərək, deyib: "Qara Dəniz sazişinə mane olan çatışmazlıqlar aradan qaldırılmalıdır. Türkiyə və BMT Rusiyanın narahatlıqlarını azaltmaq üçün taxıl daşınması ilə bağlı yeni təklif paketi üzərində işləyirlər".

Prezident Ərdoğan taxıl sazişinin yenidən canlandırılacağına inandığını deyib.