Bir insanın kamala çatması, İlahi hidayət olmadan mümkünsüzdür. Allah Təala rəsullar (ə) göndərərək, bəndələrini hidayət etmişdir. Peyğəmbərlər (ə) və vəsilər Allahın iradəsi ilə insanları hidayət etmiş və vəzifələrini yerinə yetirmişdilər. Məsum İmam (ə) da bu mübarək vəzifəni icra edir.

İmam Zaman ağa (ə.f) – zamanımızda bu İlahi vəzifəni daşıyan Məsumdur (ə). O Həzrətin (ə.f) əsil vəzifəsi – insanları hidayət edərək doğru yola yönəltməkdir.

İmamın (ə.f) hər yerdə olmasını bu dörd yolla ilə izah etmək olar.

1. “Cin və insanları yalnız Mənə ibadət etmələri üçün yaratmışam”. (“Zariyat” 56). Bu ayə buyurur ki, insan yersiz yerə yaranmamışdır. Onun yaradılışında hədəflər vardır.

2. Allahın təkvini hidayəti bütün bəşərə aiddir. “Və küfr edənlər «nə üçün ona Rəbbi tərəfindən (Salehin (ə) dəvəsi, Musanın (ə) əsası və İsanın (ə) süfrəsi kimi) bir nişanə və möcüzə nazil olmamışdır?!» deyirlər.

Əslində sən yalnız bir qorxudansan (və möcüzə sənin ixtiyarın və onların seçimi ilə deyil, Allahın əlindədir) və (bəşər cəmiyyətindən olan) hər bir dəstə üçün bir doğru yol göstərən (ya peyğəmbər, ya İmam ya da rəhbər) vardır”. (“Rəd” 7).

3. İlahi rəhbərlər bütün yer əhlinə nəzər salarlar. Hədislərimiz buyurur ki, əgər bizim sizin üzərinizdə nəzərimiz olmasaydı, tez bir zamanda həlak olardınız. Bu, bizim varlığımızdır ki, sizləri bir çox bəlalardan və çətinliklərdən qoruyur. (Həvzəh)

4. İmamlar (ə) bütün bəşərə nəzər salmağa qadirdirlər. “Buna görə də hər ümmətdən (onların iman, küfr, itaətkarlıq və itaətsizliklərinə şahidlik etmək üçün) bir şahid (peyğəmbərlərini) gətirəcəyimiz və səni də bunlara (bu ümmətə, yaxud o şahidlərə) şahid gətirəcəyimiz zaman (sənin və camaatın halı) necə olacaq?”. (“Nisa” 41).

Həzrət Peyğəmbərdən (s) gələn hədislərdə oxuyuruq ki, ümmətinin bütün əməlləri o Həzrətə (s) təqdim olunur və Rəsuli-Əkrəm (s) hər kəsin əməlindən agahdır və buna elmi vardır. Həmin elm bütün İmamlarda (ə) da mövcud olmuşdur.

İndi isə İmam Zaman ağa (ə.f) həmin elmi sayəsində bütün bəşər əhlinin halından xəbərdardır.