Fələstin səfirliyi ‘Əsrin sövdələşməsi’ni qondarma sənəd hesab edir
Fələstin səfirliyi ‘Əsrin sövdələşməsi’ni qondarma sənəd hesab edir
Posted on : Digər sahələr 01/29/2020
Fələstin Dövlətinin Azərbaycandakı səfirliyi ABŞ-ın “Əsrin sövdələşməsi” sənədi ilə bağlı açıqlama yayıb.
Tashaio.com xəbər verir ki, səfirlikdən APA-ya daxil olan açıqlamada bildirilir ki, dünən ABŞ Prezidenti və İşğalçı İsrail rejminin Baş nazirinin iştirakı ilə beynəlxalq hüquqa, BMT Baş Assambleyası, Təhlükəsizlik Şurası, Beynəlxalq Ədalət Məhkəməsinin qəbul etdiyi 160-dan çox qətnaməyə açıq-aşkar zidd olan “Əsrin sövdələşməsi” adlı qondarma sənəd təqdim olunub.
Açıqlamada qeyd olunur ki, sənəd işğalçı rejimin siyasi spektrindəki ultra sağ qüvvələrdən ibarət koalisiyasının ideoloqları və Netanyahunun təxəyyülünün məhsuludur, ABŞ-ın hazırkı prezidentinin administrasiyası isə bu sənədin qəbulunu daha da təşviq edib.
Səfirlik bəyan edir ki, sözügedən sənəddə Fələstinin tarixi torpaqlarında qeyri-qanuni fəaliyyətin davam etdiriləcəyi ehtiva olunur.
Açıqlama Fələstin lideri Mahmud Abbasın sitatı ilə yekunlaşır: “Mən Trampa və Netanyahuya demək istəyirəm. Qüds satılmır, bizim bütün hüquqlarımız satılmır. Sizin sazişiniz və konspirasiyanız keçməyəcək”.
