İraqda səfərdə olan İran prezidenti Həsən Ruhani müqəddəs Nəcəf şəhərində böyük mərcəyi təqlid alim Ayətullah Seyid Əli Sistani ilə görüşüb.

Tashaio.com Shafaqna-ya istinadən xəbər verir ki, Ruhani martın 12-si Həzrət Əmirəl-möminin Əli ibni Əbi Talibin (ə) nurani və pak hərəmini ziyarət etdikdən sonra, Ayətullah Sistani ilə görüşüb.

Görüşdən sonra Ruhani Kərbəla şəhərinə səfər edib və burada İmam Hüseyn (ə) və Həzrət Əbülfəzl Abbasın (ə) müqəddəs ziyarətgahlarında da olub.

Ruhani martın 11-i üç günlük rəsmi səfər çərçivəsində Bağdada gəlmişdi. Ruhani Bağdadda qaldığı iki gün ərzində bir sıra siyasi və dini şəxsiyyətlərlə görüşüb.

Ruhaninin İraq səfəri vaxtı müxtəlif sahələri əhatə edən beş əməkdaşlıq sənədi imzalanıb.

İran və İraq martın 12-si də ortaq bir sənəd imzalayaraq, gələcəkdə əməkdaşlıq üçün yol xəritəsini müəyyənləşdiriblər. İki ölkə, həmçinin qarşılıqlı vizaların pulsuz olaraq verilməsi üzərində razılıq əldə ediblər.

Deyerler.org