Fələstinli Jurnalistlərin Həmkarlar İttifaqı rəhbərliyi altında bir qrup jurnalist ötən ay İsrail rejiminin hərbçiləri tərəfindən saxlanılan fələstinli jurnalist Əli Dar Əlinin sərbəst buraxılması üçün Ramallah yaxınlığındakı Ofer həbsxanası önündə aksiya keçirib.

Tashaio.com-in məlumatına görə, həmkarlarının azadlığa buraxılmasını tələb edən jurnalistlər Fələstin bayraqları ilə yanaşı İsrail qüvvələrinin jurnalistlərə qarşı zorakılıq etdiyini göstərən plakatlar qaldırıblar.

İsrail əsgərləri aksiya keçirən jurnalistlərə gözyaşardıcı qazla müdaxilə edib.

Qrup adından açıqlama verən Fələstinli Jurnalistlərin Həmkarlar İttifaqı sədri Nasir Əbu Bəkr İsrail güclərinin fələstinlilərə qarşı törətdiyi cinayətləri ört-basdır etmək üçün jurnalistləri hədəf aldığını söyləyib.

Fələstin televiziyasının müxbiri olan Əli Dar Əli 15 avqustda İsrail qüvvələri tərəfindən Ramallah yaxınlığındakı evindən saxlanılıb.

Hazırda İsrail həbsxanalarında 20-dən çox fələstinli jurnalist var.