İranın Prezident Administrasiyasının rəhbəri Mahmud Vaizi ABŞ prezidenti Donald Trampın prezident Həsən Ruhaniylə görüşmək üçün 8 dəfə zəng etdiyini etdiyini, ancaq rədd olunduğunu açıqlayıb.

Tashaio.com-in İran mediasına istinadən məlumatına görə, Nazirlər Kabinetinin iclasından öncə mətbuata açıqlama verən Vaizi, Ruhaninin iqtisadiyyat komandası başda olmaqla Kabinetdə dəyişiklik etməyə hazırlaşdığını söyləyib.

Kabinetdə neçə nazirin dəyişəcəyinin hələ məlum olmadığını bildirən Vaizi, "dövlət başçısı hökumətdə dəyişikliyə getmək üçün müxtəlif adlar üzərində çalışır", - deyə bildirib.

ABŞ-ın İrana qarşı yürütdüyü siyasətə də toxunan Vaizi, ölkəsinin Vaşinqton rəhbərliyi ilə müzakirə etmək niyyətinin olmadığını bildirib.

Müzakirə tələbinin daha əvvəllər ABŞ-dan gəldiyini söyləyən Vaizi, "prezident Ruhani Birləşmiş Millətlər Təşkilatı Baş Assambleyasında iştirak etmək üçün Nyu-Yorka getdiyi vaxt Tramp 8 dəfə görüş üçün müraciət etdi, lakin Ruhani bu istəkləri qəbul etmədi", - deyə söyləyib.