İran Avropanı hədələdi: “24 saat göz yumsaq, Qərb ölkələrinə 1 milyon qaçqın gedər”

İranın daxili işlər naziri Əbdürrıza Rəhmani Fəzli Avropa İttifaqını qaçqın axını ilə hədələyib.

Tashaio.com Mehrə istinadən xəbər verir ki, dünya narkotik istifadəsi və alveri ilə mübarizə günü münasibətilə paytaxt Tehranda keçirilən iclasda danışan iranlı nazir, ölkəsinə sanksiya tətbiq olunmasının nəticələrinə toxunaraq, Avropa ölkələrini qaçqınlar və narkotiklə təhdid edib.

Suriyadan Avropaya hərəkət edən qaçqınları xatırladan Ə.R.Fəzli belə deyib: “Suriyada gördük. Bir miqdar qaçqının Avropaya hərəkət etməsi nə qədər səs-küy yaratmışdı. Əgər mən 24 saat gözümü yumsam Qərb ölkələrinə 1 milyon qaçqın gedər.

Sanksiyaları bəhanə edərək, narkotiklə mübarizə etməyimiz üçün lazım olan təchizatı vermədilər. Bir xəbərdarlıq kimi deyirəm. İran 24 saat gözünü bağlasaydı, İran sərhədindən Qərbə 5 min ton narkotik keçərdi”.