Həsən Ruhani çərşənbə axşamı günü gecə canlı bir televiziya müsahibəsində İran İslam Respublikasının terrorçularla mübarizədə İraq və Suriyaya kömək etdiyini, eyni zamanda İran, İraq və Türkiyənin İraqın Kürdüstan bölgəsi məsələsində əməkdaşlıq etmələrinə toxunaraq bildiribdir ki, İran regionu əmin-aman etmək ardıncadır.

İran İslam Respublikasının prezidenti İranın Səudiyyə Ərəbistanı daxil olmaqla regionda bir-iki ölkə çıxılmaqla digər ölkələrlə, o cümlədən Rusiya, Türkiyə, İraq, Qətər, Əfqanıstan və Pakistanla olduqca yaxşı əlaqələrə malik olduğunu vurğulayaraq, bildiribdir ki, Səudiyyə Ərəbistanı bölgədəki uğursuzluqlarını və daxili problemlərini ört-basdır etmək üçün İranı düşmən kimi tanıtmağa çalışır.

Ruhani Səudiyyə Ərəbistanının Qətər, İraq, Suriya və Livanda müvəffəqiyyətsizliyə uğradığını bildirərək, deyibdir ki, Ərriyad səhv hərəkətlərini davam etdirməklə yalnız öz problemlərini artırmış olacaqdır.

İran İslam Respublikasının prezidenti İranla Avropa İttifaqı arasında yaxşı münasibətləri və İranın dünya ölkələri ilə ticarət əlaqələrinin yaxşılaşdığını da qeyd edib.

Ruhani həmçinin İranı regionda enerji, dəmiryolu və internet mərkəzi adlandırıb və bildiribdir ki, İran İslam Respublikası qonşu ölkələrin əksəriyyətilə elektrik enerjisi mübadilə edir.

İran İslam Respublikasının prezidenti əlavə edibdir ki, İranın dəmir yolları tezliklə bütün qonşu ölkələrə qovuşacaqdır.