Tədbirdə ölkənin ictimai-siyasi sferasının tanınmış simaları, partiya və təşkilat rəhbərləri, Qarabağ qaziləri və ruhani alimləri, eləcə də media mənsubları iştirak ediblər.

Beynəlxalq Mətbuat Mərkəzində keçirilən tədbirdə öncə Qurani Kərim tilavət olunub. Ardınca tədbiri “Qələm” Yazarlar birliyinin sədri Qurban Cəbrayıl açıb. O, tədbirə gələn qonaqları salamlayıb və təşrif buyuran hər kəsə öz minnətdarlığını bildirib.

Tədbirdə söz alan DEVAMM sədri, ilahiyyatçı-filosof Hacı İlqar İbrahimoğlu mövzu ətrafında maraqlı fikirlər səsləndirib. O, bildirib ki, şəhid mədəniyyəti və sözü ilk dəfə 20 yanvar hadisəsindən sonra ortaya çıxıb. Vəhhabi zehniyyətli adamlar ölkəyə ayaq açana qədər istər şiə, istərsə də, sünni məzhəbindən olan Azərbaycan insanı Aşura məktəbini hörmətlə yaşadıb. Bəzi qüvvələrin səylərinə baxmayaraq tendensiya bu gün də davam edir.

Daha sonra tədbirdə çıxış edən Azərbaycan İslam Partiyasının (AİP) sədr əvəzi Hacı İlham Əliyev bildirib ki, şəhidliyin fəlsəfəsi Aşura məktəbinə söykənir. Məhz İmam Hüseyn (ə) –ın Kərbəla məktəbi bizə Allahı və vətəni sevməyi öyrədib.

Ardınca tədbirdə söz alan Qarabağ Azadlıq Təşkilatının sədri Akif Nağı diqqəti İslam həmrəyliyinə və vəhdətə yönəldib. Məhz həmrəylik sayəsində İslam dünyasının böyük uğurlara imza atacağına əminliyini ifadə edib.

AİP Qadınlar Şurasının sədri Növrəstə İbrahimova da, mövzu ətrafında maraqlı fikirlər səsləndirib. O, İmam Hüseyn (ə) –ın şəhadət məktəbinin insanlığa nümunə olduğunu dilə gətirib.

Tədbirdə çıxış edən Vətəndaş və İnkişaf Partiyasının sədri Əli Əliyev, Ağ partiyanın sədri, Tural Abbaslı, ruhani alim Cəlal Şəfiyev, ruhani alim Hacıağa Nuri və digərləri “Şəhidlik fəlsəfəsi və Qarabağ” mövzusunda vacib məqamlara toxunublar. Tədbir mövzu ətrafında diskusiyalarla davam edib