Suriya Silahlı Qüvvələrinin baş komandanlığı İsraillə sərhəddə yerləşən Colan yüksəkliklərində "əl-Qaidə" terrorçularının bazalarını məhv etmək üçün yekun əməliyyata start verib.

İslamazeri.com "Almasdarnews"-a istinadla xəbər verir ki, xüsusi təyinatlı 4-cü silahlı diviziyanın hərbçiləri hazırda Beyt-Cin məntəqəsində "Həyat Təhrir əl-Şam" (keçmiş "ən-Nusra cəbhəsi") terror təşkilatına qarşı mübarizə aparan digər ordu bölmələrinə dəstək üçün əraziyə yollanıb.

Terrorçuların bu bölgədəki mövqelərinə qarşı irimiqyaslı və yekun əməliyyata başlanılması planlaşdırılır. Hərbi mənbələrin bildirdiyinə görə, 4-cü silahlı diviziya şəhəriçi bölgələrdə və yaxın məsafələrdə döyüş üçün xüsusi təlim keçib. Bu baxımdan diviziyanın terrorçuların əsas dayaq məntəqələri olan Beyt-Cin şəhəri və ətraf rayonlarda onlara qarşı həlledici zərbə vuracağı gözlənilir.

Dünən ordu qüvvələri uğurlu həmlə ilə bölgənin yaxınlığında yerləşən strateji təpəliyi terrorçulardan geri ala bilib.