“Hakimiyyət cinayət məcəlləsindən müstəqil mətbuatın təqibi üçün istifadə edir”.

Bu sözləri Baş ofisi Nyu-Yorkda yerləşən Jurnalistləri Müdafiə Komitəsinin Avropa və Mərkəzi Asiya üzrə proqram koordinatoru Nina Oqnyanova deyib.
JMK “Turan” agentliyinin direktoru Mehman Əliyevin saxlanılmasını pisləyib və onu dərhal azad etməyə çağırıb.

Nina Oqnyanova deyib ki, Azərbaycan hakimiyyəti “Turan”-a və Mehman Əliyevə qarşı siyasi motivli təzyiqə son verməlidir.

ABŞ-ın Helsinki Komissiyasının həmsədri, senator Ben Kardin də Mehman Əliyevin saxlanması ilə bağlı narahatlığını bildirib. O, bu barədə öz mikrobloqunda yazıb:

“Mən həddindən artıq narahatam. Azərbaycanlılar azad mətbuata və azad fikrə layiqdirlər”.

ATƏT-in KİV azadlığı üzrə nümayəndəsi Harlem Dizer də öz “twitter” hesabında Mehman Əliyevin saxlanılması haqqında məlumatlardan çox narahat olduğunu yazıb.