Dini dərslərin keçirilməsi orta məktəblərə uyğun deyil - Deputat
Posted on : Digər sahələr 10/16/2017 1:00:33 PM
“Dini etiqad azadlığı haqqında” qanunun 6-cı maddəsində (Dinin məktəblə münasibəti) göstərilib ki, Azərbaycan Respublikasında dövlət təhsil sistemi dindən ayrıdır.
Amma
dinşünaslıq, dini-idraki, dini-fəlsəfi fənlər, müqəddəs dini kitabların əsasları
ilə tanışlıq dövlət təhsil müəssisələrinin tədris proqramına daxil edilə bilər.
Vətəndaşlar istədikləri
dildə fərdi qaydada və ya başqaları ilə birlikdə ilahiyyatı öyrənə və dini təhsil
ala bilərlər.
Məsələyə
münasibət bildirən Milli Məclisin İctimai birliklər və dini qurumlar komitəsinin
sədri Siyavuş Novruzov Modern.az-a açıqlamasında deyib ki, dinşünaslıq,
dini-idraki, dini-fəlsəfi fənlər, müqəddəs dini kitabların əsasları ilə
tanışlıq mədrəsələrdə, müəyyən institutlarda, tədris müəsissələrində keçirilə bilər.
“Bütün dinlər
haqqında ümumi məlumat almaq üçün düzgün tədrisə ehtiyac var. Burada söhbət
qanunla qadağan olunmayan dinlərdən gedir. Azərbaycan dünyəvi dövlətdir. Amma
hesab edirəm ki, dini dərslərin keçirilməsi orta məktəblərə uyğun deyil”.