Məhərrəmin ilk günündən Xanım Zeynəbin (s.ə) Kərbəlada olan böyük rolu və əzəməti bizə bu sözlərdən bəlli olur.

Öz yaşamı ilə bütün insanlığı heyran qoyan bir xanım elə bir məqama çatır ki, milyonlarla insan yüzilliklər boyu bu məqamı özləri üçün həyati örnək qəbul edirlər. Ali dəyərlər uğrunda Allah yanında canından əziz hər şeyini qurban verir. Bu zülmlər, yaxınlarının, qardaşlarının, qardaş oğullarının şəhid olması onu sarsıltmır, çünki Allah onları görür və bundan razıdır. Qardaşı İmam Hüseyn (ə) şəhadətə yetişdikdə belə, başı üstünə gəlib söylədiyi sözlər budur: “Allahım, bu qurbanı bizdən qəbul et”.

Bu gün insanlıq Xanım Zeynəbə (s.ə) borcludur. Kərbəlanın hər anına baxsaq, Xanım Zeynəb (s.ə) mübarizəsini, Xanım Zeynəb (ə) iffətini, Xanım Zeynəb (ə) səbrini, Xanım Zeynəb (ə) əzasını görürük, Xanımın (s.ə) necə böyük əzəmətə malik olduğunun şahidi oluruq.

“Onlar ki, şəhid edildi – Hüseyndir (ə). Qalanlar da Xanım Zeynəbdir (s.ə)” söyləyən alimlərimizdən birinin  bu buyuruşu özündə çox geniş mənanı ehtiva edir.

Kərbəla faciəsi yaşandı. Onun mahiyətinin qorunması və bu gün yaşamasına görə  bizlər Xanım Zeynəbə (s.ə) borcluyuq. İmam (ə) şəhid edildikdə düşmən rahatlandı və sandı ki,  dinin “fatihə”si verildi. Amma buna imkan verməyənlər – Xanım Zeynəb (s.ə) və İmam Səccad (ə) oldu. İmam Hüseynin (ə) uğrunda şəhid olduğu ali dəyərləri insanlara Xanım Zeynəb (s.ə) öz mübarəzəsi və mübarək şəxsiyyəti ilə çatdırdı. Yezidin (lən) sarayında öz çıxışı ilə insanları dərin qəflət yuxusundan ayıltdı. Rüsvay olmuş Yezid (lən), qorxudan günahı İbn Ziyadın (lən) üstünə atdı.

Yezidin (ə) sarayında İmama (ə) əza saxlayan, bu əzalarla, çıxışlarla insanlara Kərbəlanın dərslərini çatdıran – Xanım Zeynəbdir (s.ə).

Bir qadın əsirdir, əlləri zəncirlənib, acdır, susuzdur. Xanım Zeynəb (s.ə) hər şeyini itirmişdi, ancaq izzətini bir anda olsun itirmədi.

Bu kimi gözəl, böyük dərsləri dünya durduqca Xanımdan (s.ə) öyrənmək mümkündür.

Düşmənin əsas narahat olduğu və daim onu aradan aparmaq istədiyi iki böyük dəyər vardır. Bunlar Aşura məktəbi və Qaib İmamın (ə.f) intizarıdır.

Son nəfəsinə kimi bu dəyərlərin mahiyyətini bizə anladan Xanım Zeynəbdir (s.ə). Həyatının son anlarında, son nəfəsini verərkən İmamın (ə) qanlı köynəyi əlində söylədiyi söz: “Hüseyn, Hüseyn” idi.

Buna görədir ki, deyilir:

Kərbəla, Kərbəlada qalardı əgər Zeynəb olmasa idi.

Kəsik baş Neynəvada qalardı, əgər Zeynəb olmasa idi.