"Azərbaycanın qədim mədəniyyət ocaqlarından olan Dərbənd şəhəri məhv olmaq təhlükəsi ilə üzləşib. İnfrastruktur dağıdılır, yollar bərbad hala salınır, ağaclar məhv edilir". Bu barədə şəhər sakinləri Axar.az-ın Dərbəndə ezam olunmuş əməkdaşına bildiriblər. Onlar Dərbəndin infrastrukturunun dağıdıldığını, yaşayış üçün imkanlarının düşünülərək məhdudlaşdırıldığını və tarixi abidələrin məhv edildiyini deyiblər.

"Dərbənd xəbərləri" qəzetində çalışan jurnalist Telman Tahirli də şəhərin sosial problemlərinin başdan aşdığını söylədi:

"İşıqforlar dağıdılıb. Bunun bir məntiqi nəticəsi olmalıdır: ya yenisini qoymalıdırlar, ya da söküb aparmalıdırlar. Amma heç bir iş tədbirli şəkildə görülmür. Şəhərimizə baxsanız, görərsiniz ki, bir dənə istirahət etmək üçün park, yaşıllıq yoxdur. Hamısını məhv ediblər".

Şəhər sakininin sözlərinə görə, başsız qalan şəhər kortəbii şəkildə idarə olunur: "Hələ də şəhərin su gəlməyən yerləri var. İnsanlar suyu 1 kilometr kənardan daşıyır".

Sakinlər çətin durumda olduqlarını bildirərək azərbaycanlılardan və Azərbaycan hökumətindən yardım istəyirlər:

"Bizim başqa gedəcəyimiz yer yoxdur. Azərbaycan hökumətindən yardım istəyirik. Bizə kömək etsinlər".