Azərbaycan İslam Partiyası Səudiyyə Ərəbistanında yaşayan görkəmli İslam alimi Şeyx Nəmr Baqir haqqında kral hakimiyyətinin ədalətsiz və qərəzli ölüm hökmünə qarşı etiraz  bildirib.

Azərbaycan dindarları, inanclı, haqsevər insanlar adından İslam aliminin haqlı müdafiəsinə qalxan siyasi qurum Səudiyyə Ərəbistanı Krallığına bununla bağlı rəsmi müraciət ünvanlayıb. Müraciət, etiraz aksiyası keçirən islamçılar tərəfindən yazılı şəkildə Səudiyyə Ərəbistanı Krallığılnın Bakıdakı səfirliyinə təqdim edilib. 

Müraciətdə deyilir:

Səudiyyə Ərəbistanı krallığına 

Səudiyyə Ərəbistanının Qətif şəhərində yaşayan, İslamın təməl dəyərlərinin müdafiəsində sözünü deyən, mübariz cəhətlərilə dünya müsəlmanlarının izzət və hörmətini qazanan, sadə və təvazökar bəndə, böyük İslam alimi Şeyx Nəmr Baqir ən Nəmr ölkənizdə ədalətsizliyin və haqsızlığın qurbanına çevrilmək ərəfəsindədir. 

İslam dininin tarixi keçmişinin həqiqətlərini, bu gününün tələblərini və gələcəyinin bəşəriyyət üçün vacib şərtlərini öyrənib qiymətləndirən bir alimin itkisi müsəlman aləminin böyük itkisi ola bilər. 

Şeyx Nəmrə qarşı hakimiyyətinizin edam hökmü müqəddəs dinimizə, onun görkəmli xadimlərinə arxadan zərbədən başqa bir şey deyil. Əslində bu addımınız İslam düşmənlərinin dəyirmanına su tökmək, onların niyyətlərinə, başqa sözlə dinimizin zəiflədilməsi maraqlarına xidmət etmək deməkdir.

Sağlam düşüncəyə sığmayan bu addım İslam dünyasında əks reaksiya doğuraraq ciddi qarışıqlıq yaradan təxribat kimi də qiymətləndirilir. Bizə görə, haqlı irad və ittihamdır.

Azərbaycan İslam Partiyası böyük alimin ölümünə verilən hökmü əziz Peyğəmbərimizin istək və vəsiyyətləırinə arxa çevirməyin göstərisici hesab edir. Düşünürük ki, belə təhdid və məhrumiyyətlərin alimlərə tətbiqi həm də yerli hakimiyyətin zəifliyindən, rejimin idarəetmədə buraxdığı ciddi səhvlərin ört-basdır edilməsi cəhdindən, haqqın və ədalətin yanında duranları pərakəndə salmaq və İslamı parçalamaq istəyindən irəli gəlir.

Biz Azərbaycan müsəlmanları, İslam siyasi təəssübkeşləri olaraq rəhbərlik etdiyiniz hakimiyyətdən dünya müsəlmanlarının narahatlığını, haqq sözü deməkdə İslam aliminin üzərinə düşən vəzifəni öyrənib nəzərə almaqla Şeyx Nəmr Baqirin haqqında çıxarılan ölüm hökmünü dəyişmək, dəyərli alimin azadlıq və İslam yolunda gərəkli, fədakar fəaliyyət hüququnu özünə qaytarmaq barədə təcili qərar qəbul etməyi tələb edirik. 

Yol verilən haqsızlıq və ambisiya, hər şeydən öncə, bir İslam aliminin itkisi olmaqla, iki müsəlman xalq arasında ciddi etimadsızlıq yaradan neqativ amilə çevrilə bilər.

Biz tərəqqipərvər bəşəriyyətin mübariz insanlarını dünyamızın xilası üçün nazil olan İslam dininin, onun dəyərli alimlərinin müdafiəsinə çağırır, hər cür ədalətsizliyi rədd edirik. /