DEVAMM-ın Ayətullah Nəmr barəsində çıxarılan edam hökmünə etiraz bəyanatı
Posted on : qafqaz 10/16/2017 12:59:32 PM
Son günlər ərzində İslam ümmətinin gündəminin əsas mövzularından biri də Ayətullah Şeyx Nəmr barəsində çıxarılan edam hökmü ilə bağlı olmuşdur.
Dünyanın hər yerindən Ayətullah Şeyx Nəmrin edam hökmü ilə əlaqədar narazılıqlar eşidilməkdədir. Beynəlxalq insan haqları təsisatları Ayətullah Şeyx Nəmrin həbsini və edam hökmünü qətiyyətlə pisləyir, bu qeyri-qanuni hökmü onun insan haqları sahəsində gördüyü işlərlə, hüquq və azadlıqlarının təmin edilməsi istiqamətində göstərdiyi fəaliyyətlə əlaqəli olduğunu vurğulayırlar.
DEVAMM və İçərişəhər “Cümə” məscidi dini icması olaraq, Səudiyyə Ərəbistanı hakimiyyətinin bu addımlarını birmənalı olaraq pisləyirik. Bu hökmün qeyri-qanuni olduğunu bəyan edir, əslində Şeyx Nəmrin fəaliyyətinə görə cəzalandırıldığını, onun timsalında digər fədakar insanları qorxutmaq, fəaliyyətdən çəkindirmək niyyətinin güdüldüyünü bildiririk.
Eyni zamanda bildiririk ki, Şeyx Nəmr barəsində çıxarılan edam hökmü - həm İslam ümmətinin parçalanmasına xidmət edən yeni fitnə, həm də insanların öz hüquq və azadlıqlarını tələb etməsini əngəlləməyə xidmət edən provokasiya kimi qiymətləndirilir. Ayətullah Şeyx Nəmrin edam hökmünün ləğvini və azadlığının təmin olunmasını tələb edirik”.