Tashaio.com-ın məlumatına əsasən, Ağacanyan Ermənistan və Azərbaycan liderləri arasında dekabrın 7-nə planlaşdırılan görüşün ləğv edilib-edilməməsi ilə bağlı sualı cavablandırarkən deyib: “Danışıqlar prosesi heç də çıxılmaz vəziyyətdə deyil. Biz qeyd etmişik ki, konkret razılaşma var və Ermənistan ondan imtina etmir. Bu baxımdan Azərbaycanın mövqeyi və davranışı yeni bir şey deyil. Elə hallar olub ki, Azərbaycan tərəfi ilkin razılığa əsasən görüşlərə qatılmaqdan imtina edib, bu, təbii ki, müsbət proses deyil”.

Qeyd edək ki, Ermənistan baş naziri Brüsseldə keçirilməli olan 7 dekabr sammitinə Fransa prezidenti Emmanuel Makronun dəvət olunmasına israrlı olduğuna xatir hələlik bu proses pozulub. Bununla da ilin sonunadək iki qonşu dövlət arasında sülh sazişinin imzalanacağı real görünmür.

Azərbaycan Respublikası Fransanın Qarabağ məsələsi ilə əlaqədar sərgilədiyi mövqedən narazıdır və bu ölkənin öz bitərəfliyini pozduğuna görə vasitəçilik səlahiyyətini itirdiyini qeyd edir.

Xatırladaq ki, Fransa Senatının ardınca noyabrın 30-da bu ölkənin Nümayəndələr Palatası da Azərbaycana qarşı sanksiyaların tətbiq edilməsi və qondarma Dağlıq Qarabağ Respublikasının müstəqilliyinin tanınması barədə qətnamə qəbul edib. Bu qərar Paris ilə Bakı arasında gərginliyə səbəb olub və Fransaya nota verilib.