Yəmənin Ənsarullah hərəkatı sentyabrın 3-də başladıqları son hərbi əməliyyatın ikinci mərhələsində Səudiyyə rejiminin rəhbərlik etdiyi koalisiya qüvvələrindən ən azı 200 nəfərin öldürüldüyünü və yaralandığını bildirib.

Tashaio.com Əl-Məsirəyə istinadən xəbər verir ki, Yəmən Silahlı Qüvvələrinin sözçüsü general-mayor Yəhya Sərii keçirdiyi mətbuat konfransı çərçivəsində, əsir aldıqları koalisiya əsgərlərinin görüntülərini paylaşıb.

Sərii Yəmən ordusu və inqilabi xalq komitələri qüvvələrinin raket birliyinin sentyabrın 3-də başladıqları son hərbi əməliyyatın ikinci mərhələsində 6 missiya həyata keçirdiyini və bunların ən vacibinin Nəcran Hava Limanının vurulması olduğunu deyib.

Sərii Səudiyyə rejiminə qarşı “Nəsru min Allah” əməliyyatının davam etdiyini bildirib və həmin əməliyyatla bağlı görüntüləri paylaşıb.

Yəmən Silahlı Qüvvələrinin sözçüsü 3 sentyabrdan etibarən PUA-larla 16 döyüş uçuşu həyata keçirdiyini və havadan müdafiə qüvvələrinin müxtəlif növlərdə Apaçi helikopterlərinə qarşı 40 əməliyyat həyata keçirdiyini bildirərək, koalisiya qüvvələrinin də bu müddət ərzində 600-dən çox hava hücumu təşkil etdiyini qeyd edib.

“Əməliyyatın ikinci mərhələsində 120-dən çox maşın və zirehli texnika məhv edilib, koalisiya qüvvələrindən ən azı 200 nəfər öldürüldü və yaralandı”, - deyə o, bildirib.

Sərii işğalçı koalisiyanın hücumları dayandırmayana qədər hərbi əməliyyatları dayandırmayacaqlarını bildirib.

Səudiyyə rejimi və koalisiya qüvvələri Yəmən Silahlı Qüvvələrinin sözçüsünün açıqlaması barədə hər hansı bir cavab verməyib.