İrana səfər edən İraqın prezidenti Bərhəm Saleh ilə birlikdə 17 noyabr səhər saatlarında Tehranda birgə mətbuat konfransı keçirən prezident Həsən Ruhani, iki ölkə arasındakı ticarət həcminin ildə 20 milyarda qədər artıra biləcəklərini deyib.

Tashaio.com İRNA-ya istinadən xəbər verir ki, Ruhani mətbuat konfransında bunları deyib: “İki ölkə arasındakı münasibətlər tarixi, mədəni və milli-regional mənfəətlər baxımından xüsusi bir yerə malikdir, çünki bu ölkədəki rəsmilər İran rəsmiləri ilə birlikdə İraqdakı diktatorluğa qarşı mübarizədə 30 il əməkdaşlıq etmişlər.

Bu gün qarşılıqlı əlaqələrimizi nəzərdən keçirərək, siyasi və iqtisadi münasibətlərin inkişaf etdirilməsinə təkid etməklə yanaşı, iki ölkənin bu istiqamətdə daha çox gücə malik olması nəticəsinə gəldik. Hazırda İran ilə İraq arasındakı iqtisadi əlaqələrin dəyəri 12 milyard dollar həcmindədir ki, bunu 20 milyarda qədər yüksəltmək olar.

İraq tərəfi ilə elektrik ilə neft məhsullarının ixracı və həmçinin neft kəşfiyyat əməliyyatları üzərində fikir mübadiləsi apardıq. İŞİD-ə qarşı mübarizədə yanaşı olduğumuz kimi, xalqlarımızı toz duman problemindən da azad etməliyik”.

Görüşdə digər mövzulara da toxunan Həsən Ruhani, belə davam edib: “Regional məsələləri də müzakirə etdik və iki ölkənin regionda bərqərar olan sabitliklə əmin-amanlığın hər kəsin xeyrinə olması qənaətinə gəldik. Təbii ki, bu istiqamətdə də xarici tərəflərin müdaxiləsinə heç vaxt razılaşmırıq”.

İraqın prezidenti Bərhəm Saleh də İranın dəstəyini heç vaxt unutmayacaqlarını bildirib: “Bu gün İran ilə əlaqələrimizin əhəmiyyətini yaxşı başa düşürük və iqtisadi, mədəni və siyasi əlaqələrimizin qədim tarixi var.

İran və İraq xalqları qonşu və müsəlman xalqlar kimi, bölgədəki bir çox önəmli proseslərdə fəal rol oynayıblar və biz İranın dəstəklərini unutmarıq.

İranın İraqda terrorçuların məğlub edilməsi istiqamətindəki rolu həyati əhəmiyyət kəsb edir və iki ölkə arasında əlaqələrin inkişafı hər iki tərəfə faydalı olacaq.

Region xalqlarının maraqlarını güdən yeni bir sistemin formalaşdırılmasına tərəfdar olduqlarını vurğulayan Bərhəm Saleh, qurulacaq yeni sistemdə ölkələrin müstəqillik və suverenliyinə hörmət edilməli olduğunu söyləyib.

İki ölkə arasında azad ticarət zonalarının yaradılmasına əhəmiyyət verdiklərini deyən İraq prezidenti, dəmir yolu layihəsinin qısa bir müddətdə həyata keçirilməsini istədiklərini qeyd edib.