"Şübhəsiz ki, ayələrimizi inkar edənləri (tezliklə) odda yandıracağıq. Hər dəfə onların dəriləri yandıqca, əzabı (daim) dadsınlar deyə, Biz o (dəriləri) başqa dərilərlə əvəz edəcəyik. Həqiqətən, Allah Qüdrətlidir, Müdrikdir." (Nisa, 56).

İzah: Cəhənnəm əhlinin əzabının şiddəti və ağırlığı da Cənnət əhlinin rifah və asayişi kimi vəsfəgəlməzdir. Bu ayəyə görə, Cəhənnəm odu o qədər yandırıcıdır ki, əhlinin bədəninin dərisini qoparıb ayıracaqdır. Amma Allah kafirlərin bədəninə yeni dəri gətirəcək ki, yenidən bu əzabı dadsınlar. 

Hədis: Bir nəfər İmam Sadiqdən (ə) soruşdu: “Yanan dəri başqası ilə necə əvəz oluna bilər?” İmam cavab verdi: “Əgər bir kərpici götürüb sındırsan və torpağa çevirsən, sonra qəlibə salıb başqa bir kərpic düzəldə bilməzsən? Bu yenə həmin kərpicdirmi? Bəli, həmin kərpicdir. Onda bir dəyişiklik yaranmışdır. Amma hər ikisi bir kərpicdir.” (Təfsiri-Qumi, c. 1, səh. 141).